陳庭欣唔錫唔安樂 最愛雀仔按摩
無綫小花陳庭欣（Toby）出名愛小動物，其飼養的3隻鸚鵡擁有不少粉絲，日前她在社交網開直播講「雀經」，而養雀新手何啟南帶了與太太新養的鸚鵡「翠兒」前來一齊開Talk，半小時的節目，吸引不少雀鳥愛好者支持。期間Toby兩隻鸚鵡與「翠兒」打交，Toby即手執藤條作狀教訓，之後呵番，她笑言最愛「雀仔按摩」氹寶貝。
何啟南唔諗生B
由於疫情嚴峻，Toby坦言每次帶鸚鵡到雀仔舖做直播，要花很多工夫：「我由屋企揸車接佢哋出去，直接到雀仔舖，出入都會消毒，或者用動物嘅消毒水幫佢哋噴身，不過最重要係主人嘅個人衞生！（怕唔怕錫佢哋有危險？）每次返屋企，我會清潔好先咀佢哋，因為我同雀仔習慣咗咁Close嘅接觸，如果唔係，佢哋會唔開心。」
至於養雀新手何啟南透露兩個月前飼養「翠兒」，笑言以前養大狗，從沒想過養雀鳥：「係我太太想養，我就從來冇諗過，怕用手揸住佢時會捏親佢！但接觸後又好得意，『翠兒』同狗一樣好嗲、好有記性。（養雀唔養人仔？）我同太太暫時唔諗生小朋友，玩雀好啲！」