何廣沛演出零防護：明白市民憂慮
藝人何廣沛與江嘉敏前晚於大角咀拍攝無綫新劇《食腦喪B》，劇情講述二人駕車時遇上地震。現場約10名臨時演員扮露宿者，加上台前幕後工作人員約30人，埋位前人人戴口罩防疫，引來不少市民駐足睇熱鬧。
對於日前被指拍戲時「犯聚」，何廣沛坦言：「其實我哋拍外景，經常有警察到場了解，睇吓有冇申請、會唔會阻街等。當日我同警察有啲距離，只係聽到佢哋叫現場人士盡量企開啲。我明白市民嘅憂慮，不過我哋埋位冇得戴口罩仲驚，喺毫無保護下工作，始終有風險，台前幕後都好敬業，希望大家唔好戴有色眼鏡睇我哋。」
而江嘉敏笑言曾體驗地震：「喺屋企食食吓飯覺得郁，我妹妹問係咪我行緊搞到咁，笑我係大笨象，後來證實係餘震。」又指劇集將煞科，希望「劇接劇」爭取演出機會。