謝東閔嗌朱智賢食多啲增肥
入行十年的謝東閔，昨日到電台宣傳新歌《最冷的一天》，講到成為今年樂壇新人，笑言雖然唔緊張，但就好期待、感覺好得意，並揚言要攞樂壇新人獎。他透露之後會再有一、兩首歌推出：「係劇集插曲。（想唱多啲劇集歌？）梗係想！有個心願係自己拍嘅嗰套劇係包辦埋主題曲，當然都希望出首自己歌，想講吓入行十年嘅經歷。」他冧爆說緋聞女友朱智賢主動幫手網上宣傳，好感謝她。
談及女方拍劇有着婚紗場口，故要增肥，謝東閔笑指增肥好：「佢太瘦、要食多啲嘢、瞓多啲。（肥咗身材好咗？）冇留意呢樣，哈哈！」又超貼心隔空關心「女友」：「佢好叻、做戲好犀利！但有叫佢拍外景小心啲，因為佢接觸好多人，有叫佢如果唔使拍嗰陣一係上車、一係去冇乜人嘅地方，同埋勤啲用搓手液、戴口罩。（你好擔心喎！）擔心o架！都唔想佢有咩事。」