何依婷臨場換熱褲坐楊明大髀

何依婷與楊明昨日拍住上宣傳劇集。

楊明、張振朗、蔡思貝、鄧佩儀、何依婷及吳家樂等，昨午現身電視城為劇集《機場特警》宣傳。處女拍劇的依婷於劇中情傾楊明，前晚播出的一場戲，她身穿短褲坐上楊明大腿，隨即掀起網民熱話！

依婷昨日表示該場戲她首天開工就拍，導演起初嫌她略為生硬，經商討後，索性叫她坐上楊明大腿，最後豁出去完成戲份。她又急忙代楊明澄清：「事前大家有溝通同綵排，佢冇加戲。本來我唔係咁，導演唔收貨，叫我出去換番背心短褲，覺得咁先配合角色。依家拍緊第二套劇，都有啲類似嘅場面。（成日坐人大髀，做咗『大髀專員』？）唔好咁講啦，我驚搵唔到男朋友呀。」

張振朗玩「HeHe胸襲」

楊明透露當日曾被安排與助理編導「對戲」，笑指對方比依婷「重好多」，自己聽吩咐照做，女友莊思明亦未有打爛醋埕。昨日活動上，他更與劇中好兄弟張振朗互相「胸襲」，談到為對方的「捽背戲」，楊明即大讚張振朗背肌滑。原來每集開場短片，扮演「童年張振朗」的小朋友，其實是張振朗姪兒，他說：「好多網民都發現咗，想畀佢見吓世面。（佢好好戲喎！）如果跟佢學，我就唔會演得咁衰啦！」

張振朗與楊明互相「胸襲」，場面搞笑。

蔡思貝繼續女鐵人上身，做掌上壓。

至於蔡思貝談到劇中演出如女鐵人，她說：「拍親劇集唔係喪跑、畀車撞，就係着住高踭鞋劈友，大家都笑我辛苦命。」鄧佩儀則透露為拍攝一場喊戲，自己閉氣準備入戲，搞到腦部突然缺氧，手部一度抽筋。