王君馨更衣室困獸鬥
無綫藝人王君馨「舞」得又打得，於劇集頻頻顯身手，早年她於《城寨英雄》中飾演「花曼」，着住旗袍亦打得出色，打到贏埋台慶最喜愛角色獎項，去年拍攝《唐人街》再以十二路譚腿真功夫與打得之人伍允龍肉搏，同樣「唔好蝦」，成功闖出「打女」路線。
為求畢業焗啞忍
據知，君馨5月即將開拍新劇，劇中繼續打到飛起，她受訪時坦言已有心理準備打餐飽：「我非常期待！未拍過時裝打戲，自己都好想試吓打爛仔交。（以前有冇試過？）喺美國讀書時試過畀同學欺凌，佢哋喺我同朋友落樓梯時推我哋，嗰次真係差啲打起上嚟，不過因為仲有一個月就初中畢業，我足足忍咗一個月。」
談到遭受校園欺凌，她相當感觸，大爆以前於美國讀小學時已被欺負，自己性格直率，會膽粗粗為他人出頭，忍得手但忍不到口，吓吓「做架両」還拖。她憶述：「初中時去咗曼哈頓一間學校，好多唔同種族嘅人，有一日同朋友出街，有個黑人女仔鬧我朋友Helen，問佢點解同我出街，佢哋仲吐香口膠喺Helen頭上，我好嬲佢哋！有一日打完排球，喺更衣室佢哋仲叫我小心啲，當時我真係驚，但唔夠佢哋打，又驚要重讀，咁就好唔抵，所以惟有死忍！」