莫可欣叫停包場加強消毒

莫可欣放下老闆身段，親自落舖抹枱消毒。

雖然疫情肆虐，莫可欣與兩位閨蜜於赤柱開設的兒童工作坊，依然吸引不少家長帶小朋友前來學習，不過可欣日前受訪時坦言生意仍受影響：「例如以前周末一定爆場，依家就坐唔滿，好多包場嘅生日派對亦即時叫停，不過暫時OK嘅，咪守吓先囉。本來我哋諗過喺九龍搵舖開分店，依家決定押後到抗疫成功之後。」

潤膚露變鬼口水

為保障顧客健康，可欣「針對」地下、枱及櫈等，頻頻落手落腳打掃兼消毒，並將門口吸客的生招牌「巨型Slime It」（俗稱鬼口水）暫時收起。罕有偕女兒符迦晴亮相的可欣笑言，工作坊的概念源於女兒：「兩年前開始，我發現屋企嘅日用品好似潤膚露、眼藥水同膠盆等突然唔見晒，開佢房門竟然發現咗4、50盆『鬼口水』，原來佢攞晒啲嘢嚟用！」兩母女如今攞正牌「親子樂」，令彼此感情更親密。

受疫情影響，莫可欣擱置開分店計劃。

莫可欣指女兒最鍾意玩「鬼口水」。

珍惜與女兒相處

她坦言原定兩年後送迦晴到英國升學，如今要延遲：「佢竟然自己講，話唔想咁快離開我同老公方中信，但應承咗一定會出國升大學。佢仲有幾多年肯跟喺我哋身邊吖！所以決定佢話事，我哋都好珍惜呢段時光。」