鄭俊弘最乖老襯聽晒老婆話

鄭俊弘出道以來,拍過金牌監製梅小青不少作品,最近更演出其退休作《法證先鋒IV》,他笑說:「喺《法證》系列我最資深,四輯拍咗三輯。今次都係做法證人員,但要求高好多,好多嘢要跟足法證人員去做,對白又英又中,所以入到廠個個匿埋一二邊唸經咁!」

劇中演宅男的他暗戀朱晨麗,但一直不敢表白,他笑說:「平時我都係宅宅哋,鍾意匿喺屋企音樂房彈結他。女友冇投訴,大家有自己嘅空間,都會一齊入廚房煮飯。佢就活躍啲,多啲開心能量,我就靜啲,呢啲一凹一凸嘅配搭都幾好,大家搵到個平衡。」

先享受二人世界

不少準新人因新冠肺炎而押後婚期,鄭俊弘透露與何雁詩的婚禮年底在美加舉行,所以未受影響,現時心情也未去到緊張階段,相信婚後也不會有太大改變:「大家有共識,過多幾年二人世界,事業上搏殺吓先,生咗BB就冇自由(o架)喇!」籌備婚禮期間,兩口子沒有拗撬,因他最終也會乖乖聽老婆話:「佢對件事係多啲心思嘅,上網搵完資料就會叫我畀意見,佢最唔鍾意我話『求其啦、你話事啦』,依家開始要畀心機啲去畀意見,哈哈!」

而談及與梅小青的緣分,一直受她提攜的鄭俊弘說:「由訓練班出嚟,小青姐就搵我拍劇,《青出於藍》、《心花放》、《胭脂水粉》、《法證先鋒》系列。最記得拍《青出於藍》嗰陣,我嘅演技好生硬,佢搞咗個小型頒獎禮,頒咗個最佳進步獎鼓勵我,個獎我Keep到依家。」他更因而成為「御用細佬」:「郭羨妮、廖碧兒、蒙嘉慧、陳敏之都做過我家姐,做人細佬好開心,好多人照顧,依家見到仲叫佢哋做家姐。」