白色情人節露兩手 鍾舒漫收雞尾包甜到漏

入得廚房的鍾舒漫趁白色情人節親手打造蛋糕,她自爆小時候曾大膽送禮向男生表白,試過送繡了名字的手巾,亦曾獲男生送雞尾包示愛!現階段她對拍拖結婚抱興奮期待的心情,亦相信自己定會找到真命天子!

今日是白色情人節,英皇歌手鍾舒漫(Sherman)特地送上靚靚蛋糕,祝大家過得甜甜蜜蜜!她預備了玫瑰荔枝流心蛋糕及玫瑰伯爵茶流心蛋糕,材料都用上自家養生品牌的大馬士革玫瑰精油,有美顏、保濕、調節內分泌等作用,注重健康的她認為飲食很重要。

講到情人節女生送禮向心儀男生表白,男生就會在白色情人節回禮,她笑言年輕時試過整手作示愛:「我試過整朱古力、蛋糕送畀男仔,仲試過喺條手巾上面繡個名畀人,但最尾係冇結果,我都覺得我好大膽,我從來都係比較怕醜,送禮物畀一個鍾意嘅男仔係需要幾大嘅勇氣。」她亦冧笑指試過收到男生的小禮物:「記得細個情人節有個男仔去到我住嘅附近,送咗3個雞尾包畀我,我淨係有一次同佢傾偈講過我鍾意食雞尾包,唔知佢係咪想追我啦,但我覺得好Sweet。(有冇一齊咗?)咁就冇。」愛下廚的她坦言拍拖後有時間就會為男朋友露兩手,亦謂男仔懂下廚會加分。

想幾年內結婚

提到幾年前與吳浩康分手後沒再拍拖,Sherman即故弄玄虛笑說:「你哋又知?當然中間都有啲人出現,有揣摩嘅時期,唔覺得好Dry,但就算係一個人嘅狀態我都Handle得OK,呢個唔係孤獨,係享受單獨嘅時候,畀自己睇清楚好多嘢。」而現階段絕對是有拍拖對象就想結婚:「唔想再拍吓試吓唔OK就拜拜,每一個合係因着快樂,每一個分帶嚟好多痛苦,唔想經歷咁多呢啲。」35歲的她對未來充滿盼望,不擔心找不到合適對象,坦言會心急拍拖結婚,但只是興奮期待的心急,目標幾年內可以披嫁衣。