黎美言蝕百萬 開Live教班止血！
歌手黎美言（Winkie）三年前成立泰拳舞蹈學校，成功轉型更已落實衝出國際開校，卻因為疫情全面喝停，損失七位數字，現只靠食老本繼續營運。不想坐以待斃的她，諗計於網上開班授課，希望殺出一條血路！
Winkie開班，卻因新冠肺炎而停課，她說：「做老師責任好大，學生肯嚟上堂，做足清潔措拖，但都驚會唔會有傳染，所以都停咗。（損失好多？）都係，之前有幾個海外project，有人搵我喺東南亞開學校，依家全部停晒，原本傾緊幾個公司嘅企業培訓都停埋。（企業培訓係邊類型？）培訓員工與員工之間嘅合作，透過運動更加有默契，又會教佢哋減肥瘦身。因為疫情成個月喺屋企，加埋都損失七位數字，但好彩啲嘢只係延期，依家佢哋都仲話暑假會再合作。」停工零收入，開支卻依然龐大，她說：「我都擔心，因為都有幾個員工，有啲開支都keep住要畀，好彩呢三年都做得唔錯，有賺錢可以共度時艱，應付到呢個疫情。」
睇住學生做運動
有危就有機，Winkie都不想坐以待斃，她想出在網上教學，救人自救：「網上教學都唔係為賺錢，但呢個係一個趨勢，依家網上直播教學生，呢個唔同拍片放上網，而係我都可以睇到學生做運動，變得更加互動，想畀大家一個鼓勵，做多啲運動，共渡難關，對抗疫情，好多媽咪湊小朋友冇時間上堂，依家可以喺屋企做。」
男友批評當激將法
不論從商抑或做娛樂圈，Winkie背後都有個支持她的男人：「我哋拍拖五、六年，感情好穩定，我做咩佢都支持。（計劃結婚？）本來都諗住結婚，因為好想生小朋友，但見依家生小朋友好大壓力，心態都有啲改變，對組織家庭好迷惘，仲未諗好。」她又指男友是生意人，在創業上提供不少意見：「佢好成熟、好容忍我，又教我好多生意上嘅技巧，佢成日話我做得差，不過我知佢係想刺激我變得強啲。」