傳有狗狗中疫 阿Sa陳瀅視如仔女絕不棄養

圈中不少藝人都是愛狗一族，由於有新冠肺炎確診者的寵物疑中招，消息一出，令人憂慮飼主會選擇棄養寵物「避炎」，眾星即齊聲呼籲切勿棄養！

陳瀅出名是愛狗之人，她表示：「所有主人都當自己嘅寵物係家人一樣，如果『家人』有事，絕對唔會隨便放棄佢，反而係更加愛惜，畀更多愛佢哋！」養狗又養貓的蔡卓妍（Sa）同樣視寵物如親人：「小動物都係自己家人，唔應該離棄家人。」她強調確診者的狗仔雖然對病毒測試呈弱陽性反應，但不代表狗仔已確診新冠肺炎，叮囑飼主切忌過度驚慌。

郭秀雲憂動物遇害

郭秀雲認為最重要是做足防疫措施，但亦擔心出現棄養潮：「希望大家冷靜啲處理，好多人反應過度。雖然感染咗係好大件事，但我因為環保工作成日去啲比較偏僻嘅地方，嗰度嘅村民反而擔心啲人殺狗，或者有唔鍾意動物嘅人，會想借呢個機會殺動物。」她又表示家中飼養了不同寵物，最近不會帶牠們落街大、小便，盡量做好防疫措施。

陳瀅錫晒狗狗，當正係屋企人。

陳貝兒攬住貓貓，呼籲大家切勿棄養。

廖碧兒怕交叉感染

至於廖碧兒家中有七隻愛犬，她直言視為親生子女：「寵物係我哋家庭嘅一分子，所以絕對唔希望大家因為呢件事棄養。」並指一定要做足清潔工夫，平日出街後會用濕毛巾及溫水為愛犬清潔，自己回家後亦會立刻消毒，之後才接觸狗狗。她表示暫時不會帶愛犬出街，因為當中有四隻經常一起玩，若有一隻不幸染病，其餘幾隻就有機會被傳染，所以要加倍小心。由於不能外出，她會多買玩具給愛犬玩當做運動，亦會買維他命C給年紀較大的狗狗，增強免疫力。

同樣是狗主的馬浚偉，亦在社交網發文回應事件：「莫講話根本冇受感染，就算真係受感染，咪盡力去醫囉！」陳貝兒、歌手馮凱淇亦上載寵物相，明言絕不棄養，會永遠全力愛護主子！