劉美娟母女𥄫仔眼都凸埋

曾參選健美小姐奪得季軍而入行的劉美娟,與歌手張崇德婚後育有一對子女,仔女均患有「選擇性失語症」,但經兩人多年來悉心照顧,一對子女已病愈。日前,劉美娟做跟得媽咪,與11歲囡囡張日晴到中環行街,長得亭亭玉立的日晴愈行愈熱,還邊行邊除掉外套。母女其後於店內左揀右揀,睇完手袋又睇黑超,但最後空手而回。沿途往上車時,她們見迎面而來一名大騷麒麟臂的紋身背心男,目不轉睛,望到口擘擘眼都凸埋。