未收身拍逃命戲 湯洛雯自嘲暴龍趕客
藝人湯洛雯參演的新劇收視報捷，她謙稱拍攝期間尚未收身，擔心似「暴龍」趕客，又計劃收視達40點的話，自創着「40點式」慶功。
無綫熱播劇《法證先鋒IV》幾位主角陳煒、譚俊彥、湯洛雯（靚湯）及黃浩然等前晚為節目《流行經典50年》錄影。對於《法》劇收視高開33點，成績是近年之冠，眾人對此相當滿意，靚湯笑言：「擔心第二集我出場，收視會下跌！」因當日她臨危受命接替被易角的黃心穎上陣拍攝，監製梅小青勒令她減肥惜失敗，靚湯自嘲尚未收身成功，十足一隻「暴龍」趕客。而扮演記者的她前晚出場時為逃避黑幫追殺，奔跑入墳場一幕，果然「斤両十足」！她說：「拍嘅時候壓力好大，黃浩然唔笑嘅時候我好驚，後來發現佢好照顧我，亦多謝團隊容忍我成日NG。」
黃浩然為鼓勵靚湯收身成功，搞笑說：「靚湯呢？唔見咗佢嘅？」又大爆她入戲後有新花名「一Take湯」，表現絕不失禮，又叫靚湯倘若收視達40點，要着三點式「慶功」，她即說：「40點梗係着番『40點式』出嚟啦，全身遮住晒。」
譚俊彥唔使靠老竇
譚俊彥表示大前晚出席首播活動後，至凌晨4時仍然睡不着，看到網上很多留言，有讚有彈有畀意見：「最深刻係有人話我靠老竇（狄龍），其實我好耐冇見佢喇！」首集播出他與黃浩然的格鬥場面，他指播出只幾分鐘，其實拍足20個鐘：「拍到唔止底褲盡濕，拍嗰日係年三十晚，拍完我瞓到年初三，年紀大機器壞！」大騷事業線的陳煒踢爆醫生男友是《法證》系列粉絲，自然有追看她的演出，問到男友的評價，她說：「一個字，型！」