利穎怡帶隊派「金」

藝人利穎怡、郭千瑜及楊證樺，前晚出席由御藥堂創辦的慈善基金活動，做義工到深水埗向露宿者及長者派發約14,000個口罩及糧食。楊證樺坦言視口罩如「黃金」，大嘆早前要四圍撲口罩，相當慘情：「之前儲備唔夠一盒，小朋友冇得返學留喺屋企，我同太太要返工先用，好珍惜咁用。後尾組織贊助人送咗16盒『黃金』畀我，自己留咗8盒，其餘就送咗畀有需要嘅朋友。」他感謝慈善機構捐出口罩，相信日後會再有派口罩活動。