曾偉權因病辭演《法證》 舊愛送祝福
患上肺癌的曾偉權本於《法證先鋒IV》擔重戲演出，然而開工幾日後因病辭演，監製梅小青惟有改由鄭子誠接演。劇中原本的拍檔陳煒昨日回覆說：「佢其實拍咗一日戲，話唔係好舒服，第二日去做身體檢查，佢本來角色戲份好重，小青有問過佢做唔做到，最後佢冇做到，我當然希望佢快啲好番。」
梅小青也承認有此變動：「佢同我講身體唔舒服，但冇詳細講其他嘢，佢話唔想影響我哋拍攝，所以就轉咗人，後來佢身體舒服番啲，其中一個單元都有搵佢再做番。」
而曾偉權舊愛梅小惠前晚直認雙方已沒聯絡，她說：「我真係唔清楚佢嘅身體狀況，但我會祝福佢，希望佢快啲好番啦！」問到可會致電慰問？小惠坦言不欲打擾對方，若然他日偶遇定必再送上祝福。