菊梓喬驚中招自我隔離14日
歌手菊梓喬最近受新冠肺炎疫情影響，多了時間宅在家煲劇煮飯仔，原來她月初病到暈，同事擔心她「中招」紛紛追問，而她亦自我隔離14天，乖乖留在家中。
菊梓喬（Hana）昨日為無綫新劇《法證先鋒IV》片尾曲《我不是她》拍MV，自爆前一晚失眠，問是否穿婚紗太興奮？她說：「唔係呀！係因為新型肺炎，令好多工作要延期同取消，變咗好多時候煲劇同煮嘢食，搞到生理時鐘日夜顛倒。」
口罩所餘無幾
MV原定本月1日拍攝，但因她患上腸胃炎而押後：「當時有同事問我有冇周身骨痛，都有一下擔心自己係咪中招，因為真係病到暈暈哋。我仲諗如果真係中咗招點算，但最後屙清晒、排清毒素就冇事喇！」她又笑言自我隔離14日：「冇乜出過街，但呢段時間個個都留喺屋企好鬱悶，心情係有影響，惟有朋友間互相發放正能量。」記者笑問腸胃炎期間可夠廁紙？她笑說：「好彩之前買咗條。（口罩呢？）口罩真係所剩無幾，之前訂嘅都未有貨，惟有再去搜購吓啦！」
望十年內出嫁
談及一身婚紗造型，Hana說：「聽人講婚紗唔可以着太多，17同27嘅次數都會嫁唔出，我唔係第一次着，有幻想將來結婚會着咩婚紗，亦覺得女人點都要結一次婚，咁至係圓滿人生。不過我諗有排都未結，目標係十年內嫁得出，依家要先搵一個好男人，但感情嘅嘢要講緣分。」