陳瀅另類港女 拒兵仔服侍
女星陳瀅在新劇演港女，貪靚、貪錢又愛「收兵」，但現實中的她卻統統相反，懶到爆的她高峰期5日才洗髮一次，嚇得髮型師頻頻投訴！感情方面，她對「收兵」亦相當抗拒，免得浪費別人光陰！
陳瀅於無綫劇集《黃金有罪》演一名70年代港女，經常打扮得花枝招展，為搵錢不介意走捷徑。為演活性格調皮的角色，她刻意表情誇張，不少朋友都讚她Cute！談到劇中不時穿短裙，可有收身？她透露當時剛巧大病一場，又屙又嘔，連續兩星期冇胃口，頓時瘦了一圈：「依家睇番個樣都幾衰，加上自己懶，成日唔補妝。（平時都懶？）不嬲出晒名懶，依家剪咗頭髮至洗多咗頭，以前長頭髮唔鍾意洗，頂到4、5日先洗。記得有次日日都要Set頭，髮型師摸到有幾油、有味出嚟，就知幾多日冇洗，但依家最多3日就洗。」
同舊愛做Friend
陳瀅的角色被何廣沛暗戀，但卻視對方做「兵」，最近傳翻撻舊愛何猷亨的她，現實中卻非常抗拒收兵：「當我知你鍾意我，我會更加同你有距離，直接叫你搵過第二個。」又分享甜蜜回憶：「記得第3個男友係加拿大讀大學時識，但大家3、4年後先拍拖，佢講番當時一識我就想追我，中間曾經做過啲乜，聽番覺得好甜蜜，呢個男友入行前先分手，大家再見亦是朋友，仲有聯絡。」
除了何廣沛，陳瀅與洪永城也有感情線：「當時我疊咗3套劇一齊拍，每日只有身軀返工，好樣衰，佢會Push我，拍床戲會搵我研究，睇吓模仿邊套電影。」又笑言當時病住拍激情戲，擔心傳染對方，又讚對方「紳士」，自爆：「我嗲佢用佢隻手摸我！」