朱晨麗話題女王上位快

朱晨麗係上位上得算快嘅無綫花旦，佢喺《多功能老婆》入面演技突飛猛進，角色巴辣得嚟又幾可愛。作為一個成功演員，除咗演技都要多功能，例如製造話題，朱朱絕對有呢方面功能！好似一開始同何廣沛傳緋聞，煲咗幾年依然係冇米粥，勝在長講長有，每次訪問總會提吓對方，互相宣傳，大家好。之後拍攝《大醬園》就同龔嘉欣傳不和，《多功能老婆》又有是非，佢大爆洪永城自加摸錫戲份，搞到洪永城覺得佢大嘴巴而唔妥，變成「嬲嬲朱」嘅佢呢招真係高，既可見報，又冇講到明對方加戲嘅真正意圖，畀大家自行幻想，同埋呢件事大部分人都傾向支持朱朱，唔會留有壞印象，仲覺得佢好勇唔會啞忍。咁醒目，有咩理由唔上位吖？