荷里活著名男星Channing Tatum與英國天后Jessie J上月被傳分手，結束一年情。話口未完，二人最近翻撻成功！他前日在Instagram（Ig）放閃公開甜蜜合照宣布復合，卻因維護女友而與fans在網上開火！
向來戀得低調的Channing前日破例在Ig晒愛，照片中他與Jessie分別戴上吹氣獨角獸帽賣萌，女友更親吻他面頰。不少fans被「閃」爆即留言送上祝福，不過卻有人竟然「贈興」留言：「Jenna（Channing前妻）同你一齊好睇啲。」
該口痕fans的留言旋即撻着Channing把火！他留言反擊，鬧爆該fans無禮：「我通常唔會咁樣回應，但你似乎同其他任何一個令人討厭兼無思想嘅人一樣，都係可怕嘅人！點解你唔認真考慮自己所做嘅嘢，呢個好傷害到人，但唔傷到我。如果你要喺我專頁上成為一個恐怖可憎嘅人，唔撐Jess（即Jessie J）係代表永恒同擁有無可動搖美貌嘅女人嘅話……那請你離X開呢度！冇人想要你喺度，尤其係我。」
愈說愈激動的Channing還留言表示沒有人及得上Jessie的美貌，甚至連前妻Jenna都不及她美麗。之後他自知講錯說話，即時再留言「補鑊」，說道：「只想對啲愛搬弄是非嘅人講清楚，Jenna係美麗同好好，但唔代表佢靚過或好過任何人。美貌唔能夠量度，只有情人眼裏出西施。我今晚將會同我嘅正斗女人享受拍拖夜。拜拜！」
隨着在Ig留言護花之後，他與Jessie前晚以情侶姿態一同出席在洛杉磯舉行的2020年MusiCares年度人物活動，是二人拍拖以來首次合體出席公開活動。