蔣家旻羅天宇 跨時空母子情
羅天宇（Joey）與蔣家旻（Angel）在處境劇《愛．回家》演兩兄妹深入民心，今次在新劇《香港愛情故事》再度合作，挑戰演母子！Joey自爆劇中有多個「第一次」：「同龔嘉欣第一次合作就有好多親密場口，劇中講我好有性方面嘅需要，要成日喺好逼嘅地方親熱！有啲場口要露上身同埋個股，但今次唔會操到好大隻，因為角色冇咩錢，仲要日日做足10幾個鐘，要盡量瘦啲。（拍親熱戲驚尷尬？）同嘉欣唔熟，反而放得開啲。」
同劇的Angel透露今次挑戰「媽咪級」：「我做龔慈恩嘅少女版，即係Joey媽媽，大家喺唔同時空出現，亦冇對手戲。呢次係我第8次做少女版角色，今次有好多內心戲同鬧交場面，涉及複雜嘅情感戲，所以同以往嘅少女版唔同，係個新挑戰！」
包餃子食不停
問到農曆新年有何節目？Angel指家人每年都會包餃子，食不停口：「父母係北方人，細個就跟媽媽學包餃子，係過年時一定做嘅嘢，有時仲會包油角，所以過年就有好多好嘢食。」Joey則表示：「近幾年屋企生意喺節日時比較忙，大家節日意識冇咁強，但自己好鍾意食蘿蔔糕，太婆就好叻整年糕同蘿蔔糕，非常足料，我負責幫手煎。」