連詩雅雪卵造B要神隱
踏入鼠年，連詩雅（Shiga）率領同門藝人鍾浠文、黎紀君及邢慧敏食開年飯，攞個好意頭！講到過節習俗，Shiga年初一必定會與家人食個豐盛午餐，再去親戚家中食蛋餃，寓意發大財；黎紀君就一定會行年宵，今年適逢最親的堂姑姐回流香港定居，是她們首次共度新春；鍾浠文家人會做家鄉應節食品；邢慧敏則笑言要與親朋好友決戰四方城！
潮流興團拜，她們亦異口同聲笑指可以一次過（豆）齊利是，問到親戚可有趁機追問感情事？向來少提另一半的Shiga說︰「屋企有唔少長輩都冇結婚生B，所以覺得未結婚都正常，反而關心工作多。（媽媽有八卦？）好少，問候身體多。」
結婚有顧慮
家庭觀念重的Shiga雖然喜歡小朋友，但現階段不會為「鍾意」而結婚趕工︰「今年入行10周年，我有好多嘢想做，希望有個演唱會，未達成都唔會諗下一步。加上科技咁發達，好多人選擇雪卵，如果我真係冇咁快生小朋友，做呢樣嘢都好正常。」語畢又卻步︰「打排卵針嘅副作用係肥，真係要雪要預一排唔見人，同時如果個幾月冇工作，我會好焦慮！」她又坦言受父母離婚影響，不想重蹈覆轍︰「細個以為冇影響，但大個後令我更加唔想經歷，要真係遇啱人先考慮結婚。（徐浩係啱嘅人？）呢刻冇諗呢樣嘢。」
黎紀君開Live練口才
至於剛踩入主播界的黎紀君，不時開Live教觀眾整甜品，她認為工作有挑戰性︰「成日講嘢詞不達意，開Live就好似主持緊一個節目咁，有班觀眾睇住你，冇得修補、綵排，希望喺2020年有更多新身份同大家見面！」而經常做「空中飛人」的鍾浠文、邢慧敏分別想在新一年操成腹肌及考瑜伽牌。