黎諾懿一蠔三食壯陽追女
烹飪高手黎諾懿下廚煮賀年食品，特別以蠔做食材炮製炸金蠔、煎蠔餅及薑葱蠔，強身健體兼壯陽，希望追女成功：「啲人話食蠔生仔機會大啲，雖然我想生女，但啲蠔好補，強壯咗個身體先。追女係今年首要大計，太太成日話我唔生性，已經不停催，佢話唔想做高齡產婦。」
自家品牌走平民路線
事業方面，諾懿透露今年主打綜藝節目，希望可開拍《懿想得到》第二輯：「第一輯收視好好，大家拍得好開心，仲有好多好朋友未請上嚟拍，好似陳敏之、馬國明同伍詠薇等，同埋第一輯有小小瑕疵，啲嘉賓太舒服，下次要加啲難度高嘅畀佢哋做。公司仲有傾緊想拍香港版《中餐廳》，如果開到應該下半年成事。」
此外，諾懿有意進軍飲食業，早前推出慈善賀年糕點外，又成立自家品牌「店小懿」，他說：「有自己嘅品牌，起碼推出嘅食物有咩事，我都負責任！呢個名係太太改，起初覺得好老土，但諗番又好襯我，掉轉嚟讀係『懿小店』，我不嬲都唔係行高檔路線，反而想做啲平民化嘅嘢。」