胡鴻鈞走出雪櫃 續約換獎?

星夢歌手周柏豪、菊梓喬、吳若希、胡鴻鈞、譚嘉儀與連詩雅等,前晚於《2019年度勁歌金曲頒獎典禮》狂掃26個獎項成大贏家!唱片公司老闆何哲圖拉大隊到九龍城一間餐廳慶功,將獎座擺上枱晒冷﹗

連續3年捧走「最佳演繹男歌星」、又憑《為愛冒險》奪金曲獎的胡鴻鈞表示很滿意成績:「原本嚟係睇大家攞獎,自己知咩事,休息半年冇出歌,同埋得一首歌入圍,所以攞獎好喜出望外。」對於有傳他之前「扭計」唔續約而被雪藏,如今奪兩獎,令人聯想有續約換獎之嫌,他澄清:「合約仲有一段時間,年期就唔透露。(連續3年拎『演繹獎』有壓力?)冇,攞獎隨緣,最緊要大家鍾意聽我啲歌,好多謝公司、Fans喺我休息嗰陣畀咗好多鼓勵我,之後會Keep住繼續寫歌。」

出爐「歌王」周柏豪揚言自掏腰包請團隊食飯慶祝︰「唔想買啲太實質嘅嘢送咁市儈。」又指會將獎座放在公司:「慣咗擺喺公司,好似氣勢勁啲,每個獎都有意義。第一年拎男歌手獎,細個睇電視冇幻想過自己有呢一日,中間發生好多事先成就到呢個獎項,自己都受寵若驚,嚟頒獎禮覺得係歌曲獎機會大啲,男歌手獎真係冇諗過。」

譚嘉儀冇失望

至於賽前被視為「金曲金獎」及「最受歡迎女歌星」大熱的譚嘉儀,最終只奪兩首金曲獎及「最受歡迎網絡歌星」,問到可有失望?她坦言很滿足:「個網絡歌手已經好大,其實最緊要遇到好歌,絕對唔失望。自覺未夠班,喺未來日子仲有好多機會。」