陳自瑤喪賺百萬 重事業輕老公
藝人陳自瑤（YoYo）獲玄學大師李居明幫手「催運」，隨即接獲百萬酬勞的豐胸廣告，行正財運！不過談及老公王浩信獲獎則「封嘴」，又明言未有計劃為他慶祝。
YoYo、石詠莉、莊思敏及李居明等昨午出席新片《致富者聯盟》首映。YoYo透露拍攝時跟監製李居明先後到訪杜拜及紐約：「師傅（李居明）教我喺杜拜沙漠裝樽沙，去到紐約又教買盞紅燈返嚟，話兩樣會催旺我。」談到被爆拍竣該片返港，即以百萬酬金接拍豐胸廣告，她說：「託師傅鴻福啫！佢送咗好多法寶畀我。（點解只求事業，唔求感情嘢？）我不嬲好緊張事業，但只要成個人旺嘅話，樣樣都會轉好。（老公王浩信拎咗人氣男歌手獎，點同佢慶祝？ ）大家都知佢呢排拍緊劇好忙，所以唔慶祝喇！」
幫香港求得中中籤
至於李居明透露早前幫香港鼠年求得「中中籤」：「豬年都有同薛家燕試過，租咗架直升機喺黃大仙上空求籤，求得下下籤，好彩今次求得中中籤，籤文係指香港將走出難關，登向好嘅方向。香港現時表面好似好動盪，但其實並非想像中咁差，大家唔使移民。」
而石詠莉感激李居明找她加入團隊，直言從對方身上學到吸金大法，連身旁的女性朋友也受惠，其中兩位即有拖拍，並透露計劃離巢：「同唱片公司仲有少少合約，依家會同老公商量，日後簽公司定係自己做製作。」