如果囡囡有拖拍？當堂窒咗唔識答……
育有一對子女的張兆輝，大仔20歲，細女亦已15歲，樣貌標致，亭亭玉立，現於英國升學，錫女錫到燶的他，當然非常掛念，但坦承最艱難日子已過去：「知佢喺當地開心同識同學仔，唔會咁孤獨就OK，有時大家會視像，但係少咗搵我，我就會投訴囉！記得佢細個時咩都係『Daddy』，依家只可以趁佢喺香港望多啲，好在個女都乖，仲會拖住翹住我，呢啲錢買唔到。」
談到將來女兒拍拖，身為廿四孝父親的他會有何反應？張兆輝頓時語塞，並似眼有淚光表示：「都要接受啦！呢排有問佢有冇識到朋友，佢話冇，心儀對象都未有。叫佢有嘅時候話我知，睇吓個男仔適唔適合個女，其實我唔係寵個女，只係覺得佢前半生係我要好好保護佢，下半生就嫁去人哋度，所以我要畀幸福同愛錫佢，希望第日有個好錫佢嘅人陪佢下半生。（將個基地搬去英國？）睇佢點發展，始終香港朋友多，英國久唔久探吓可以，我可以唔出門口都得，但太太係事業型嘛！」