羅力威家務一腳踢 老婆幫補家計

近年在樂壇不算活躍的羅力威，從未想過放棄音樂，更直言：「應該話冇乜需要去放棄。」才華橫溢的他，能一手包辦曲詞編甚至監製：「我喺呢方面比別人強，所以唔需要放棄佢，音樂永遠陪伴我嘅生命，我永遠會彈琴畀老婆聽，畀貓仔聽，或者寫一隻歌畀自己。」

認慳家 搵錢交租

在香港樂壇的機制下，他坦承收入或有影響，慶幸他為人慳儉，在他眼中所有事物都有一個價：「我覺得一套衫頂盡千幾二千蚊，手機唔應該過一萬蚊，當然幾千萬嘅靚車都有，但我覺得幾萬到幾十萬已經好盡。我係好慳，當然慳唔會令你富有，只不過我嘅價值觀係咁。」他坦言要努力搵錢交租，又大方笑說：「當我收入差嘅時候，咁啱娶咗個老婆，有時佢收入好嘅，可以幫你處理到一啲你處理唔到嘅支出，好多時都歸功於我老婆，我都唔介意講囉！」

羅力威樂於做晒所有家務，不喜歡老婆插手。

羅力威自認慳家，但強調是價值觀問題，並非窮到燶。

女人衫 晾到頭痛

結婚兩年，阿威專責打理家頭細務，他自豪說：「我做得好就我做！」每朝早他定必花一小時打掃，由吸塵洗地抹枱到洗衫，全部一腳踢：「總之所有嘢都係我做，我做得好好，唔需要佢，千祈唔好洗我啲碗，因為我唔會覺得你洗得乾淨過我。」他笑言晾女人衫最頭痛：「呢邊有兩條繩，嗰邊啲扣又唔知搭去邊，長度又怪，有啲質地未見過，唔知係咪地球物質！」

除照顧老婆外，他對老婆的貓貓同樣服侍周到：「我朝早餵佢食呢個味，夜晚餵另一種，跟住觀察佢啲便便，發現有奇怪就換過另一種再觀察，所以我唔鍾意阿僑突然餵佢。」他更笑說：「如果將來有一日請工人姐姐，我會好失落囉！」