薛家燕憂傷感應小田伴左右
薛家燕、黎瑞恩及杜德偉等共十多個單位歌手出席慈善音樂會，向已故「全能音樂人」黎小田致敬，薛家燕在騷上自爆對摯友離世未能釋懷而多次落淚，更指感覺到他仍陪在身邊；黎瑞恩則大讚故友做事一絲不苟又玩得。
黎小田（Michael）去年12月初病逝，前晚一眾生前好友及後輩包括黎瑞恩（小恩子）、薛家燕、陳欣健、陳敏之、衛蘭、林德信、泳兒及小肥等，現身麥花臣場館演出《To 小田 With Love Forever 音樂會》獻唱Michael的作品，席上播出他與已故張國榮（哥哥）的舊短片，片中Michael讚哥哥奮發圖強，哥哥則笑說：「最失敗係識到你！」英皇集團主席楊受成在片中表示和Michael相識60年，彼此無間斷聯絡長達50年。而任主持人的陳欣健出場時說：「啲掌聲咁少嘅？依家我哋請Michael坐低欣賞。」
《心肝寶貝》蝴蝶飛舞
當日Michael的靈堂曾出現被指是他「化身」的琴鍵紋蝴蝶，故薛家燕在新抱提議下穿上蝴蝶裙唱《心肝寶貝》，重提和Michael合作《流行經典50年》時，她哽咽說：「嗰陣佢好愛我、錫我、支持我，真係我好好嘅拍檔！」再唱《胭脂扣》時，螢幕播出Michael的彈鋼琴片段，恍如隔空為她伴奏，她說：「最後一次『合作』好難得，Michael，I Love You。」
她受訪時，再次帶淚說感到故友在身邊：「感覺到佢在場聽歌，就連綵排時，佢真係好似喺側邊伴住我。」並坦言自摯友離世個多月，仍然未能釋懷，要仔女帶她旅行散心，不過當在騷上重遇Michael助手時，彼此不敢太接近，因怕一見面就抱頭痛哭。
小恩子在台上獻唱《再共舞》、《驟雨中的陽光》及《歌衫淚影》緬懷Michael，台下受訪時稱對方的歌伴她成長，講到跟對方最後一次及最難忘的一次都發生在音樂節目《流行經典》：「第一次上節目嗰陣，其他Artist未到，佢又要計時間，咁我就話幫佢唱，同佢、班樂隊由2點去到6點，玩咗成4個鐘！嗰次知佢做事好認真，Detail位都要做到足，因為嗰集係有《胭脂扣》呢首歌，佢指定要啲燈好迷幻，要粉紅色，呢啲都要諗埋，咁認真嘅前輩，令我學會以後做每件事要認真看待。」