色狼出沒！Danielle Bregoli：拍真人騷後走紅嘅16歲美國問題少女Danielle Bregoli，轉個頭化名Bhad Bhabie走咗去做饒舌歌手，不知幾紅！佢早排喺Instagram公開被30歲拳手Adrien Broner私訊調情嘅截圖，寸爆佢撩未成年少女，係咪想坐監？Adrien事後辯解話係一場誤會，仲賴最衰係Instagram冇顯示年紀，搞到佢睇個樣就以為Bhad Bhabie係成年人喎！
偶像變粉絲：畢彼特：荷里活型男畢彼特係唔少人嘅偶像，近日佢喺一個電影頒獎禮後台，見到韓片《上流寄生族》嘅韓星宋康昊，即時由萬人迷變成小粉絲，上前打招呼時，雙手仲好肉緊咁握實對方！宋康昊當然亦好開心，同片演員李善均同李姃垠見到呢個場面，都忍唔住爆笑！
有心唔怕遲：蒼井空：前日本AV女優蒼井空舊年5月1號為老公DJ NON剖腹誕下孖B，今年係首次同一對心肝椗過新年。佢尋日上載着和服、抱住7個月大孖仔嘅賀年照，用中文喺微博留言：「新年快樂！今年也請多多關照，我也永遠愛大家哦！」雖然足足遲咗4日，但所謂「有心唔怕遲，10月都係拜年時」，相信粉絲都唔會介意！