吳千語拉鏈嘴 唔恭喜林峯成婚
吳千語前晚偕張智霖（Chilam）及張繼聰等出席賀歲片《家有囍事2020》煞科宴，被追問舊愛林峯升呢人夫一事，吳千語堅決不肯開口講恭喜：「又問？其實之前回應咗喇，唔希望焦點喺我身上。（想唔想其他人快啲恭喜你？）我有好消息都會通知大家。雖然身邊都有人好關懷同錫自己，但嚟緊我會集中火力工作，同埋成立關於運動嘅時裝品牌。」
至於男主角Chilam與阿聰談到票房問題，異口同聲說：「百花齊放，都希望No.1。（有分紅？）總之想老闆賺錢，我哋繼續有工開。」阿聰透露戲中用英語打小人：「對白背足兩日，又要喺外籍演員面前好自信咁，有啲緊張。（又話騷巨鵰？）嗰時啱啱拍完套拳手戲，仲有啲嘢剩咪騷吓囉，不過唔係好大膽啫！」煞科宴上抽獎時，Chilam抽中大利是，即自掏腰包「加碼」，炒熱全場氣氛。此外，同場的于淼自言負責「情挑」Chilam，打趣指對方艷福無邊，她亦有被電暈。而陳庭欣談到被指「偷食」的男友楊振源上載二人咀相放閃，她說：「我唔知佢Post相，唔算刻意放閃。（網民話你係傻港姐？）30幾歲人畀人話傻都幾可愛，但我唔想解釋太多，怕愈描愈黑。」
