邱晴發掘真心拒即食愛情
兒童節目《Think Big天地》主持邱晴（Mandy），憑日系可愛外表及甜美笑容，俘虜不少宅男。她遺傳了媽咪的靚靚基因，但卻高出足足20厘米，有次兩母女出街，媽咪竟被誤以為是她的妹妹，令她笑爆嘴！
Mandy最滿意自己一雙長腿，但因身材高大容易給人「大隻」的感覺，她自爆拍攝《美女廚房》第三季時，連主持都叫她「大舊」：「其他美女學徒身形好靚，我就肉騰騰，但朋友安慰我，話呢個係特色。」她自爆由中六開始發福：「每次瘦番啲，我又會食番多啲。我真係好鍾意食，就算好古怪嘅食物都敢試，例如食蟲，朋友都話好鍾意睇我食嘢。」
目標開畫室
今年20歲的Mandy本已很喜歡小朋友，自成為兒童節目主持後，對小朋友的愛有增無減，甚至有意在兒童教育方面發展，她解釋：「我好想教佢哋做人處事！我本身修讀美術，想開間小朋友畫室，教畫畫之外，亦可以單對單同佢哋傾偈，呢個係我為20歲定下嘅目標！」
至於感情方面，單身的Mandy自認被動，有心儀對象也不會告白，因為怕食檸檬。向來是「被表白」一方的她，有次拒絕男性好友的告白，搞到雙方由朋友變陌路人，她說：「我喊咗成個月，媽咪話依家係你飛人，點解仲傷心過對方！」她認為另一半最重要是互相尊重及真心：「依家好似好即食文化，我信一見鍾情，但都要時間觀察。」