突然Mood到出聖誕歌 JW臨急搵人打救
正當大家以為歌手王灝兒（JW）今年只推出一首歌產量少之際，她於年末送上「彩蛋」給Fans，毫無預警下推出聖誕歌《年末感恩》！她透露11月中忽發奇想，希望藉聖誕歌帶給大家溫暖：「幾忙都好，都會約朋友食飯交換禮物，媽咪又會整聖誕樹，感覺好Warm。」
錄音前小心養聲
新歌製作時間相當倉促，JW情急之下向音樂人Cousin Fung「求救」，大讚對方效率高又細心，為新歌畫龍點睛：「佢好了解我，知我鍾意Disney，喺開頭加咗呢個元素，好開心！」為趕「尾班車」，她錄歌期間不敢怠慢，事前更特別護聲：「把聲一定唔可以沙，唔可以病，嗰幾個星期都好小心同節制，唔會飲酒、食辣嘢，將成個人包住，好暖！」而原本預四節的錄歌時間，最終只用了一節便錄好，令她大為驚喜。
男友禮物得張卡？
提起聖誕節，JW表示每年正日都必定跟家人食飯，又會準備禮物，當然唔少得男友Tarzan那一份！她大笑表示起碼會有張聖誕卡：「公司好貼心，做咗張一打開就會播首新歌嘅聖誕卡，封面係我細個嘅相，專登搵咗好多本相簿，但最後冇揀到有Daddy嗰張，有啲遺憾。（佢冇詐型？）可能佢覺得開心呢，佢以前肥啲，哈哈！」並感激家人當年有曬相：「見到啲BB相，發現屋企人帶過我去好多地方，但係零記憶。」
問會否推出新年、情人節歌等？她笑指節日歌「壽命」較短：「做歌嘅錢一樣，但好可能係嗰個節日先會聽，如果每年都會翻聽就抵。」問到年末最感恩的事，她說：「屋企人健健康康，所有朋友喺埋一齊，特別想多謝周國賢畀咗《逃生門》我，我好滿意！」又自爆被Fans催出碟：「可能明年出多兩、三首歌就出碟，希望再開騷。」
場地：cosmos