瑪姬重拾夢想唱歌預咗畀人噓

前DJ瑪姬主持形象深入民心，她自小鍾意唱歌，2005年參加《星途大戰唱歌比賽》進身最後十強，最後不敵冠軍羅鈞滿和亞軍Regen，曾自資出過一首歌，最後疊埋心水做主持，近日她獲唱歌老師鼓勵，突然激起其歌手夢，她說：「學唱歌十幾年，只係中間幾年停咗，最近學番，好開心唱歌老師肯資助我做一首歌同拍MV。（覺得自己唱成點？）覺得值7分，前輩話我唱腔有啲老，可能成日聽啲前輩嘅歌，自自然跟咗啲震音，個腔要不停進步。（有歌手夢？）年紀開始大，有啲夢想唔可以等到50歲，係時候攞番十幾年前入行嘅夢想出嚟，又有老師畀信心就試吓，老師教用新方法唱，覺得真係有進步，唔知依家係咪最佳Timing，我Open自己接受批評，諗住未推出自己嘅歌之前，唱啲Cover歌先，用我自己方法去唱，睇吓網民會唔會接受，如果網民噓、叫我返屋企瞓覺，咁就Hold一Hold先，網民批評就梗嘅。」