鄧以婷撥亂反正學優雅
身材惹火加上聲線溫柔，藝人鄧以婷被不少網友視為性感女神，但她笑言性格有點麻甩，住酒店時內衣褲會通處揈，要努力跟其女神安祖蓮娜祖莉學習性感氣質。
無綫藝人鄧以婷（Irina）年前以模特兒身份入行，曾是女子組合Super Gear成員，在節目《3日2夜》中晒Fit爆身材，成為新一代網上女神，之後多被安排做性感尤物，吸引大批網友支持。
唔介意行性感
對於被視為性感女神，Irina表示心中最性感女星是安祖蓮娜祖莉、湯唯及舒淇，各自有不同感覺的性感氣質：「安祖蓮娜性感得嚟有女強人感覺，最近扮演黑魔后又好優雅，我平時有睇佢哋嘅戲學嘢，可能我之前感覺較(0靚)妹，最近開始有啲輕熟女角色，但要我演繹得好性感嘅話，仲未Handle到，行每步路都要好婀娜，仲要努力揣摩。」講到高海寧及李佳芯拍劇初期都演過情婦、小三角色，Irina視她們為奮鬥目標，不擔心被定型：「只要自己把握得好，就會帶嚟下一次機會，我唔會介意角色係咪需要性感，最緊要有發揮。」她直言任何角色也想嘗試，而她早前到內地拍古裝劇，飾演反派大師姐，既要講普通話又要打，挑戰甚大。
甩漏唔見嘢
Irina的聲線溫柔嬌俏，笑言往往給人很斯文的「錯覺」，其實真實性格傻大姐又男仔頭：「我鍾意打機，性格都有啲麻甩，例如會用手拎起羊架、雞髀直接食，屋企又有啲亂，我去旅行通常會搞到間酒店房亂糟糟，內衣褲同啲襪亂擺，試過唔見兩套比堅尼，最近又漏咗捲髮器喺酒店，返到香港先知。」
Profile
年齡：29歲
身高：1米72
三圍：34C、25、35
嗜好：運動、睇戲、打機