郭奕芯Deep V捱凍搶峰頭
陳家樂、湯怡、郭奕芯、何珮瑜、內地女星周冬雨等昨晚盛裝出席澳門國際影展開幕禮，穿上透視Deep V、短裙晚裝的郭奕芯，波光四射，搶盡「峰」頭！陳家樂明年賀歲檔將有兩部參演作品上映，他直言好像發夢一樣，覺得自己相當幸運！
第四屆「澳門國際影展暨頒獎典禮」開幕禮昨晚於澳門舉行，群星雲集，英皇今年有三部電影參展，包括《我的筍盤男友》、《墮落花》及《盲嚇》，電影公司老闆楊受成率領眾星踏上紅地氈，其中穿上大Deep V、短裙晚裝的郭奕芯最搶鏡，湯怡則以橙色大露背晚裝裙上陣，反而一向性感的何珮瑜最密實，被搶去不少風頭，李靖筠與溫碧霞打扮亮麗，五位女星均佩戴了英皇珠寶亮相！郭奕芯笑言因首次出席澳門國際影展，所以捱凍都要揀件突出、亮眼的晚裝現身，她還指在《墮落花》中，有不少新嘗試：「好開心可以同關智斌有場好熱烈嘅激吻戲，同埋呢套戲入面我要揸槍。」
明年賀歲檔，陳家樂將有兩部英皇電影《我的筍盤男友》及《緊急救援》上畫，對此，他興奮表示猶如夢想成真：「一直覺得賀歲片應該係大製作，由最受歡迎嘅明星主演，好似哥哥（張國榮）、星爺（周星馳）咁，所以多年嚟我都好期待有機會參與，今次能夠有兩部電影賀歲，我真係覺得自己好好彩！我哋拍《我》片時都冇諗過係賀歲片，仲諗住可能係情人節，但其實套戲好輕鬆，都好適合賀歲，依家嘅目標係希望呢套戲能夠由新年一直上映到情人節，橫跨兩個重要節日！」
吳卓羲逃工飲林峯嗰餐
湯怡演出由葉念琛執導的《盲嚇》剛拍竣：「演繹失明角色已經唔簡單，我做咗好多資料搜集，最意外嘅係原來呢套亦係一齣動作片，拍大結局嗰幾日有好多動作場面，令我精神近乎崩潰，喺現場睇番回帶都忍唔住喊！」她直言慶幸戲中對手是吳卓羲、潘燦良，非常感謝他們幫忙及支持。
吳卓羲亦拍完手頭上兩部電影，其中一部是《盲嚇》，跟葉念琛合作感到很高興。談到他的老友林峯與未婚妻張馨月婚期延後，他說：「佢都冇同我講過，好老實我哋都係睇新聞先知。（你哋唔係有飯局，佢派帖咩？）冇！派帖嗰個係陳山聰，我都係知道先問佢：『喂！你結婚咩？』佢就：『哎！』我都冇考究，唔問啦，佢公開咪講，開心咪得囉！（佢都要同你度期出席佢婚禮嘛？）佢結婚我逃工啦，佢婚期幾時呀？我知嘅我話你哋知，佢好大膽唔話畀我聽，我有咩實篤佢。」
特派記者陳永峯澳門報道