阿女功課多到崩潰 郭羨妮匿廁所喊

藝人郭羨妮（Sonija）昨日出席升學分享活動，她表示女兒讀小一，早已計劃送她到加拿大升學，加上經歷之前一晚陪阿女做功課後，令她加速這念頭：「因為之前停咗課幾日，要追番啲課程，8、9樣功課兼要2個默書，真係搞唔掂，見到阿女做到崩潰，我話唔好做，佢又話唔得。」見到阿女邊喊邊做功課，令她很心痛：「做媽咪好無奈又好大壓力，我唔可以Hurt到佢，自己都爆炸，要走入廁所喊兼冷靜吓。」問到與老公可有共識？她說：「對佢冇太大分別，因為佢要返內地拍嘢，我同阿女喺香港定加拿大都一樣，唔同係坐多幾個鐘頭飛機，反而係自己要放低晒香港嘅嘢去加拿大係最大考慮。」