朱晨麗下令禁伸脷洪永城尷尬面紅

無綫台慶劇《多功能老婆》剛推出，朱朱扮演Tony的「俏嬌妻」，二人經常打鬧鬥嘴，被不少人讚是「最佳拍檔」，他們笑說：「都未到戲肉，陸續有嚟！」並指稍後劇情二人會有更多衝突和矛盾，擦出火花，朱朱更說：「會令大家覺得呢個男人更抵打，我就更抵錫。」

她預告其中一幕是二人在車內咀嘴，朱朱笑說：「拍嗰時我擔心佢咀太耐，驚佢伸脷，怕佢情不自禁，你知佢幾大膽啦！所以拍之前我同監製陳寶華同佢商量，洪永城被下令要點到即止囉！咁場戲出嚟效果都幾好。」被爆出「禁伸脷」事件後，見慣大場面的Tony即場臉紅，並說：「冇乜澄清，呢啲叫怕愈描愈黑。」

自爆遭女友「家暴」

問到Tony拍親熱戲前可會向女友備案？他說不會刻意，反而會與對手溝通清楚。至於播咀戲時可會叫女友捧場？他指女友有看劇，在旁的朱朱即笑問：「你女友會唔會好憎我？我成日咁打你、糟質你？」他竟說女友沒有嬲，反而有樣學樣：「佢有抄朱朱啲技巧，話呢招好，學習點樣糟質我、打我、虐待我，反而話要多謝你！」