馮盈盈陳庭欣台慶玩抹窗

盈盈以短褲仔晒長腿，預告台慶夜亦會性感登場！

陳庭欣、馮盈盈、張寶兒及蘇韻姿等歷屆港姐齊集電視城，為明晚舉行的台慶綵排舞蹈，屆時眾女將分別以高貴打扮載歌載舞，當中盈盈與庭欣更預告會性感登場！二人透露已練習一星期，由於舞蹈根基不算好，為免成為「豬隊友」，只好自創舞步口訣。

盈盈說：「我想練舞時生動啲，咪將日常生活擺落去，好似家務舞咁，有啲動作好似抹窗同攞嘢，練習時叫口號囉！同埋我哋會喺樓梯好優雅咁行落嚟，睇吓會唔會加插仆倒嘅動作，令到件事精彩啲！」庭欣即說：「我行你後面，到時真係要睇吓。不過我哋都好優雅，加上我件晚裝成8磅重，『抹窗』動作唔舉得太高。」二人更即席表演一小段舞，邊跳邊講口訣，相當爆笑！

盈盈（左）與陳庭欣示範自創的「家務舞」，果然似抹窗！	張寶兒（左）與蘇韻姿自嘲主力Sell優雅。	王君馨趷Pat起舞，練到周身傷。

張寶兒獲准性感

至於寶兒與蘇韻姿繼3年前參選時再合作，寶兒說：「好在啲舞步好簡單，只需要表現優雅一面。（戰衣好性感？）畀男朋友審批咗，一定冇上次咁性感，盡量表露我身上嘅優點，缺點就收埋囉！」至於蘇韻姿還有一Part單簧管演出，晚晚練到半夜，擔心被鄰居投訴。

除一眾港姐外，王君馨、高海寧與張曦雯將帶領大班藝員跳三段不同種類的舞，當中高海寧跳絲帶舞，張曦雯玩空中呼拉圈，王君馨則跳鋼管舞，由於有不少跪地動作，以致膝頭受傷，君馨說：「我哋隻舞又要揈頭髮又要一字馬，最多就係跪地動作，所以頸、腰同膝頭都扭傷。」