楊卓娜洩密 楊怡快報喜？羅仲謙：等運到！
楊怡跟羅仲謙婚後開到口恨生仔，之前謙仔表示晚晚收工後就「努力造人」，而楊怡為調養身體已停工多時，日前有傳她造人成功，謙仔賣關子說：「如果成功咗都唔講住。」昨晨楊怡胞姊楊卓娜出席慈善跑擔任主禮嘉賓，被問到妹妹疑似有喜，她避忌的說：「如果佢有咗佢會同大家講，咁開心嘅事，相信佢唔會吝嗇分享，都希望快啲有好消息。」楊卓娜言下之意似說快有好消息公布，記者即再追問楊怡及謙仔，楊怡回覆稱：「大家想多啦，係冇嘅，多謝大家關心，以後有好消息一定同大家分享，謝謝！」謙仔就搞笑說：「我嘅回應就係等運到！」
老公送木頭
昨日生日的楊卓娜專程出席慈善活動，同場還有莊思敏，楊卓娜說：「希望生日可以做啲有意義嘅事，呢幾年生日都有做慈善活動，係我嘅心願。」說到生日如何慶祝，她說：「會同屋企人食飯，又會行山，同埋做呢個慈善活動。（會感染埋小朋友一齊做？）係呀，佢都鍾意，不過因為尋晚太夜瞓，所以冇帶佢嚟。」老公送了禮物嗎？她笑言：「有呀，送咗木頭畀我，類似檀木，可以做擺設或焚燒。（叫佢送磚頭好過木頭？）哈哈，證明我唔夠現實，應該叫佢送金磚，或者黃金最穩陣，不過我鍾意藝術嘅嘢，都係小小心意，食餐飯、玩吓已經好開心。」
