老竇李安隨時再合作 李淳裸跑無遮無掩
國際大導李安之子李淳，最近與台灣「北一女神」蔡瑞雪合作電影《陪你很久很久》，飾演癡情男生的李淳為鍾情的女生默默付出。而現實生活中，他有位拍拖3年的圈外女友，二人更被拍到於平民區甜蜜拍拖，李淳坦言享受平凡的愛，抗拒一見鍾情，認為相處及陪伴更為重要：「我唔會講甜言蜜語，唔使成日黐住，各有自己空間。（感情穩定？）都係，但未知幾時結婚。（等工作有成績先結婚？）一步一步，太快就好勉強。」更自爆於美國讀高中時思想未成熟，拍拖最多3個月就被分手，認真慘情！
蔡瑞雪被拒愛大受打擊
身為大導演的兒子，李淳坦言曾因被外間標籤而不快，但想通了便釋懷：「每件事都係一種祝福，畀自己學習，佢係我爸爸，其他人點睇唔緊要，屋企人嘅價值觀都唔理其他人點睇，努力做自己就得，平時少見爸爸，都係講電話多。（父子再合作？）適合就可以，就算要好似《色，戒》咁裸露都得，呢套我都有裸體跑步，當時為咗睇對手真實反應，前面冇保護就直接除褲，覺得好自由。」
至於瑞雪在片中守護暗戀的李淳，她自言本身個性較害羞，於表達愛情方面非常弱，更曾被人拒愛，令她大受打擊。