陳山聰回味婚禮月底全力造人
新婚燕爾的陳山聰昨日復工拍劇，心情大佳的他直言婚禮片段仍徘徊腦海，計劃新劇月底煞科後全力造人，暫停接劇去搵真銀，為家庭的未來作打算。
陳山聰昨午與拍檔姚子羚、胡諾言現身上水古洞，為無綫新劇《大步走》開工，劇情交代子羚失狗，山聰化身英雄幫手尋狗。恨抱B恨到出口的山聰抱着「演員狗」不時逗牠玩，一副「慈父相」。
袁偉豪送驚喜絕密片
只請了三天婚假的他坦言身心俱疲，但人逢喜事精神爽，對未來家庭生活已有計劃：「月底拍完呢部劇，就會有多啲時間陪屋企人，到時可以開Turbo（造人）！相信短期內都唔會再拍劇住，下一部應該係《金宵大廈2》，我會利用呢段時間搵錢同忙其他嘢，為自己家庭做吓打算先。」記者恭喜他「三年抱兩」，山聰亦照單全收。
談到婚宴當晚的驚喜，山聰坦言全晚每個環節都很感動：「一定冇下次啦！所以係回味嘅，台上講謝詞時我話，想佢哋嚟嘅都嚟晒，好齊人，一眾兄弟姐妹同另一半都有到，阿Ben（袁偉豪）又操刀剪咗條驚喜絕密片畀我，不過佢話我哋當晚竟然唔記得自拍，留到佢結婚先啦！」
姚子羚買定姑婆屋
談到網民指婚宴嘉賓勁過台慶，子羚直指山聰面子大，他靦覥地說：「幾個廠嘅主角，陳展鵬、三哥（苗僑偉）都嚟到，我哋呢組就交咗畀張達倫頂住，我有請佢嘅，唔緊要啦我哋再食飯囉！」又笑言最驚喜的新婚禮物是有友人送了馬爾代夫酒店禮券，他打算明年帶太太去歎世界。問到子羚當晚有否「艷遇」？她笑言冇時間「𥄫仔」：「都係等我同胡定欣買定間姑婆屋啦！」