現年39歲的謝霆鋒從未攞過「最受歡迎男歌星」獎，但愛走在刀尖上的作風，令他成為最具話題性的「鋒頭躉」，入行23年來，由細飽受批評，連「米芝蓮之友」的廚藝都被質疑，霆鋒霸氣回應勿當人傻！
謝霆鋒於11月底假澳門舉行兩場首創的「搖滾美食節」，將至愛的音樂跟美食同步跟「鋒迷」分享。自成為「Chef Lemon」後，廚藝獲外界肯定，早年更獲頒贈「米芝蓮之友」的榮譽，但同時有人覺得他是「名過於實」，對於被質疑，霆鋒接受訪問時承認聽過無數好mean的評論：「有啲人好鍾意批評，但佢哋啲說話冇乜建設性！（介意？）做呢行冇可能唔在乎，我屎忽痕時都會去睇吓啲留言，有時啲朋友都會comment我。（會反駁朋友？）唔使拗嘅，朋友都係以事論事。」
面對各種抨擊，霆鋒學曉毋須動氣，會忠於自己走覺得正確的路，堅信做人要勇於實驗，做廚師不可只跟食譜：「尤其呢啲藝術嘢（包括廚藝），我想做創造食譜嗰個，做音樂亦一樣，唔會抄人，但呢啲過程中，一定有唔成功嘅時候。都知有啲人會唔相信、睇唔起我，但我都攞咗個『米芝蓮之友』名銜，真係唔好當人哋（大會）係傻啦！」
入廚多年，霆鋒自言在炮製美食中，除食客的滿意表情令他有成功感外，自己亦從中得到領悟，就是做人做事不用取悅所有人：「我覺得就算煮咗一樣自己覺得值120分嘅嘢，會諗仲贏唔到全世界？但原來幾勁嘅三星大廚，無論早、午、晚餐都會畀人批評，所以冇一種嘢可以征服全世界，口味嘅嘢係冇對同錯。」
不少粉絲都等他開餐廳，但這個民間訴求似乎難實行，他說：「應該唔會，因為唔想同大家少咗見面！如果開餐廳，以我呢啲處女座性格，乜都要完美，一定會長時間匿埋喺廚房，咁我就做唔到其他嘢。」問他可會考慮推出「鋒味食譜」？他認為毋須刻意，又指自己主持的《鋒味》節目已是一本「活食譜」。