側田枕頭掛頸狼狽侍女友
歌手側田與拍拖4年多的圈外女友Karen感情穩定，早前二人到日本旅行，側田全程暖男上身，對女友愛護有加，購物、點餐服侍周到，有求必應！
側田與Karen拍拖以來，不時被拍到出雙入對，今年6月，他在香港舉行一連兩場《側田My Beautiful Curse 2019》演唱，女友亦全程陪伴在側，又陪「田媽」一齊捧場，十足女主人一樣，顯然地位已得到肯定！早前，兩口子到日本東京旅行享受二人世界，盡興一輪後在當地機場返港之際，恩愛地一同在免稅店購物，期間不時耳語商量，側田聽晒女友意見，要乜買乜，未幾便買下一堆手信。側田相當醒目，先行到收銀處付款，金錢方面不用女友操心。
距離登機尚有時間，Karen建議先行用膳，並挑選了一間價錢相宜的自助式餐廳醫肚。二人入店後，Karen火速搵位坐低休息，側田不敢怠慢，識做地「自動波」起身到點餐處落Order，以免女友餓親。
一袋二袋抽上機
用餐約一小時後，二人便收拾行李離開，步行到離境大堂，側田手抽一袋二袋，有點狼狽，連旅行枕頭都冇手拎，要掛在頸上，而且連背包打開亦不察覺，而孭着名牌手袋的Karen則手揈揈，輕鬆過關冇難度。
