阿Sa男友石恆聰強「婿」登場
藝人蔡卓妍前晚為父親擺壽宴，男友石恆聰亦有到場，全程陪住女友招呼親友，影合照時還搭實「未來外父」，明顯早已融入家中！
蔡卓妍（阿Sa）與富二代男友石恆聰感情一直穩定，更屢傳婚訊。阿Sa前晚於英皇駿景擺十圍酒，為10月23日生日的Sa爸慶祝，其男友石恆聰都有到場，成為焦點！兩人平日鮮有公開拍拖，就連合照都只上載過一、兩張，愛得相當低調，但男友當晚滿場飛幫手招呼賓客，更與一眾親友影合照，這位「準女婿」還主動搭實Sa爸膊頭，另一隻手則搭着阿Sa，睇「手勢」就知他們見慣見熟，絕不陌生！看來石恆聰行「外父政策」相當成功！
乖女畀晒錢
藝人楊玉梅當晚都有出席壽宴，陳欣健則擔任嘉賓司儀。記者致電楊玉梅，她表示大家玩得很盡興，讚阿Sa非常乖女：「生日會所有費用都係阿Sa畀，個女咁乖，Sa爸應該好開心！除咗我哋之外，Sa嫲嫲都喺度，氣氛好好。」
