彭慧中被爆低胸搵食誘仔𥄫

孫慧雪（右）做「二五仔」篤爆彭慧中性感開工，真係大整蠱！

無綫節目《搵食飯團》新一輯主持孫慧雪、彭慧中、趙希洛、鄧以婷、王子涵、蔚雨芯、周志康及丘梓謙，昨日在將軍澳電視城出席記者會，並即席跟燒豬師傅學烤豬，期間雞手鴨腳，場面搞笑！元祖級主持陳國峰與鄧佩儀到場支持，並分享心得，鄧佩儀笑指可以盡情食，不用顧儀態。

孫慧雪早餐烚烚吓

彭慧中以低V裝亮相晒「胸器」，相當性感，訪問期間，孫慧雪笑指不許她拿訪問咪，以免遮住「重點」！問彭慧中平日拍節目是否一樣性感？她笑言因為見傳媒才穿得漂亮點，孫慧雪卻篤爆她：「佢開工都係咁着o架！我同周志康成日（目及）佢，哈哈！」二人不約而同表示拍攝節目以來肥了約十磅，彭慧中笑說：「開工試過一日食四餐，由朝食到晚，開工嗰日早午晚餐都唔使食。」孫慧雪更笑指試過一日五餐：「試過有次壞機，最誇張一日食咗五餐，仲要一朝早走去打邊爐！」

鄧佩儀燒豬時論論盡盡，身後的陳國峰掛住吹水冇幫手！	鄧以婷唔執輸打大心口，加啲喱士若隱若現。	趙希洛瘦蜢蜢，舉隻豬都冇乜力。

二人因拍攝節目而成為好友，孫慧雪笑指雙方有「分工」，她說：「佢負責記晒啲稿，我就負責食，有時食到連稿都唔記得講。」彭慧中大讚二人投契：「我哋原本唔識，但第一日拍節目已經撻着咗，不停講嘢，原來佢係傻嘅！」