J.Arie搭車遇色狼：有啲嘢撩PatPat
藝人雷深如（J.Arie）有份參與ViuTV劇集《假設性無罪》，其角色慘被「性侵」，更被拍下片段發放出去，令她受不住壓力自殺，終變成植物人。她坦言接演此角色難度甚高：「尤其是情緒延續，因為啲戲唔係連續拍，睇到嗰條片擺上網嘅情緒係推到最高，而跳樓嗰刻已經係欲哭無淚，因為之前崩潰晒。」
提到拍攝被演員陳子豐「性侵」一幕，她說：「我係全劇最密實嗰個，但唔知點解會畀人性騷擾，可能太密實，啲人有遐想、想揭開。（拍攝時）佢隔住件衫摸，又喺入面上下其手，但其實都係揸緊個Cushion。」她直言整件事超乎預期：「咁筍嘅？我仲諗住要有啲啲肉睇吓，點知冇，都係好事嚟嘅，因為冇人想睇。」
校褸遮手唔知做緊乜
現實中，原來J.Arie中學時試過被非禮：「記得有次喺港鐵畀人非禮，當時着緊校服，後面都有個着校服嘅男仔，我feel到pat pat位keep住有啲嘢撩緊，唔知係手定乜，覺得唔對路，我行前，個男仔又行前，行後、佢又行後，佢一路用校褸遮住自己隻手唔知做緊咩，嗰刻好嬲、好想講，但點都講唔出，因為覺得好醜，啲人可能會覺得憑咩人哋非禮你，所以就冇講。」
她坦言若現時發生的話，一定勇敢發聲：「隨住慢慢成長，覺得唔講只會畀人恰得仲勁，啲人只會愈嚟愈踩你底線。」而她為劇集創作的主題曲《風雨花》亦表達同一訊息：「有時講一樣嘢出嚟會驚畀人鬧、畀人笑、被無視，所以選擇唔講，但係咪諗住沉默一世呢？呢個係由細到大好強烈嘅感覺。」
化妝：Frances Ho @ Jessica Chan Make-up team
髮型：Bowie Lo
場地：1963木十豆寸