楊明暴脹10磅趕絕異性

高海寧狂讚黃淑儀廚藝冇得頂。

Gigi為myTV SUPER主持飲食節目《Gi味俱全》即將推出，昨午於電視城舉行記者會，獲劇集《婚姻合伙人》「囝囝」楊明、「新抱」高海寧及高層樂易玲等撐場。Gigi即場一展廚技，高海寧台上透露：「拍劇期間Gigi日日都準備靚湯、美食，返嚟宴客，日日鋪滿成枱面都係。咁啱楊明生日，佢仲親手焗個蛋糕返嚟。」

湯水生意繼續蝕

楊明受訪時談到生日蛋糕，坦言感動到眼濕濕，更被高海寧取笑「好食好住」發胖，他靦腆說：「肥咗10磅，食啲唔健康食物，又去咗馬來西亞旅行。（思明谷肥你趕絕異性埋身？）唔關佢事，係我自己忍唔到口，不過我點肥佢都覺得我有型！」談到其湯水店生意，他說：「3間店計埋都係蝕，冇辦法，淨係希望市面快啲回復平靜。（減價促銷？）我哋已經走低價路線，惟有喺食材方面再改進吸引顧客。（叫業主減租？）努力緊，其實荔枝角店已經減租20%。」

發福楊明難抵黃淑儀的美食誘惑，出手偷食。	陳庭欣短裙晒腿為活動擔任司儀。	高海寧即場試食製成品。

黃淑儀膝患拒拍劇

Gigi早前曾為囝囝徐肇平發聲，指對方加盟無綫後「被蝦」，自己亦倒戈相向，為其他電視台效力，她說：「其他電視台係部頭，今次我簽邵氏1年，係樂易玲打畀我嘅。有人欣賞自己好開心，況且地球係圓嘅。邵氏好好，搵到好多贊助。（暫時唔拍劇？）唔會，當年我拍《吾淑吾食》時整到左腳，依家有惡化迹象，醫生建議我接受『換膝頭哥』手術，月尾入院後要休息至少3個月，呢排我會拍定存貨先。」