馮盈盈浴搏張頴康跪玻璃請罪
藝人馮盈盈及張頴康在新劇中於浴室親熱，濕身咀嘴更錫埋耳仔，火辣程度爆燈！盈盈表示男友睇片後要匿埋打機平復心情，自己要跪玻璃做個好女友；頴康則指太太睇片後已拒絕跟他Goodnight Kiss。
無綫台慶劇《解決師》昨晚播出第一集，首播前一段超激預告片令人睇到嘩嘩聲！片中飾演警員的馮盈盈暗戀上司張頴康，兩人在浴室「埋牙」，馮盈盈恤衫盡濕透出性感內衣，又有胸部近鏡，張頴康則半裸上陣與盈盈激吻，情到濃時更啜盈盈耳朵，畫面香艷，令人血脈沸騰！
幫手執屋補鑊
盈盈接受訪問時表示自己也嚇了一跳，當時跟男友「寶寶」一起睇電視，超級尷尬齊齊尖叫：「嗰刻大家都唔敢睇，合埋眼，完全冇心理準備！（寶寶點睇？）佢反應好大，話只好催眠自己，話呢個只係一個似盈盈嘅女仔，之後佢去咗打機平復心情。（點補償佢？）我好乖呀！幫手執屋，睇嚟要跪玻璃喇！劇集播出街嘅時候都要好好守行為，做個絕世好女友！」講到這場親熱戲，盈盈事前已黐了膠紙，又大讚張頴康專業：「佢幫我遮晒啲穿崩位，我哋其實拍咗成晚，個身都皺晒皮，同埋飲咗好多水。」
盈盈及張頴康昨晚到將軍澳出席《解》劇首播飯局，盈盈笑言男友除了呷醋，亦心郁郁想做幕前：「佢話原來做幕前咁好，可以同異性拍呢啲對手戲，我話佢唔得，我就有賺啫！」
老婆拒絕錫錫
張頴康則笑言並不享受：「地方又細，天氣又凍，拍足幾個鐘，拍完個背脊好痛，盈盈就皺晒皮，點Enjoy？」他又指劇中尚有一場睡房親熱戲，當時盈盈扭擰不想錫嘴，但因已超時，故自己懶理其感受「照掟佢落床」。問到老婆麥雅緻睇片後有何反應？他說：「瞓覺佢唔畀我錫呀！通常我同女演員拍完親熱戲，佢都唔畀錫，要隔一日先再錫得。」