黃翠如洪永城珍惜最後破例停火
黃翠如與洪永城相隔5年再合體拍攝節目《出走澳洲》，兩人變身老年楊過與傻姑版小龍女潮遊熱點！老拍檔再聚頭，大家都變得成熟，由以前鬥做「嗌交王」到今次零拗撬，還不約而同覺得此行也許是最後合作，珍而重之！
翠如與洪永城（Tony）再拍檔主持旅遊節目《出走澳洲》，重遊10年前踏足過的澳洲，友情昇華的他們過往例必鬧大交，今次卻沒有，翠如笑說：「佢對我一樣咁Mean（刻薄），以前基本上每次都嗌交，嘈到要監製調停，真係會嬲一、兩日。試過拍《走過足球聖地》，佢攞個足球掉我個肚，話為咗效果，仲掉咗幾次，真係好嬲！」Tony笑說：「證明大家成熟咗，同埋我唔Care佢，佢亦唔Care我，因為Care先嗌交嘛！」
兩人今次「出走」決定暫時拋開一切，Tony笑說：「我諗不如搵啲瘋狂嘢做，係我提議扮楊過，佢扮小龍女嘅。」翠如笑說：「但係導演幫我借咗個傻姑頭飾，插晒花，好傻咁樣！」Tony取笑她：「佢哋知道你就算着小龍女套衫都冇乜仙氣！我就希望有少少古天樂嘅神髓。」翠如即笑他有肚腩，應是老年版過兒！節目中，兩人穿古裝去打木球，又蒲流動酒吧及走入圖書館找秘笈，瘋狂又搞笑！
翠如與Tony今次自駕遊暢行澳洲各地，Tony與鯊同游，畏高的翠如則挑戰攀石，各自克服心中恐懼。不過，Tony笑言最令他恐懼的是翠如開車：「佢一上車就問油門、煞車掣喺邊，未試過有人咁問我！」
合作意猶未盡
翠如今次帶着「冇下次」的心態完成旅程，Tony則說：「要一齊做節目係難夾，但唔抗拒。」翠如昨日在網上分享一張花絮照，相中Tony興奮到瞓地，她則坐在草地上，感性留言：「朋友，有一天或許夠老了，再一次Road Trip。這一次，好好的，作為我們友誼的紀念。」Tony亦上載二人合照，留言：「可能……係最後一次同佢拍旅遊節目。」兩人明顯意猶未盡。
服裝：Michael Kors（黃翠如）、D'URBAN（洪永城）