「珍珠姐」餐盤當反光板

「珍珠姐」拍過唔少經典劇集，最近仲撈埋舞台劇，有日邀記者做綵排，幕前予人感覺斯文有禮嘅佢，嗰日就好似另一個人咁，勁hyper，影相時無啦啦將隻腳放喺扶手度扮拉筋，記者見到已經呆咗！到做訪問時佢竟然隨手喺唔知邊度攞咗個白色餐盤出嚟，話要當反光板咁幫自己打燈，可以將自己照到白啲靚啲，在場嘅人更加O晒嘴，「珍珠姐」仲同攝記講，拍片要行遠少少，因為佢唔夠瞓，眼紅紅，但一行遠就會影埋塊「反光板」入鏡，記者提佢擺低啲，話塊板冇用，但佢鬥氣咁仲愈擺愈高，結果要攝記畀影咗嘅鏡頭佢睇，佢先知「出事」，最後死死地氣攞開塊板，行為認真騎呢！