胡美貽翻撻無望減磅有人追
「3日2夜咪神」胡美貽因擁有一對34E導彈，每次泳裝上陣定必令人心跳加速！兩年前隻身來港參選港姐，亦因泳裝環節令人留下深刻印象，沒料當時與男友亦因此吵大鑊，更成為分手導火線。陷低潮期的她暴飲暴食勁肥22磅，其後重新振作減肥。
現年25歲的胡美貽（Nicole），兩年前於母親鼓勵下，不理父親反對，以玩票性質來港參選港姐，雖然最後落選，但仍然選擇留低發展娛樂事業，她說：「媽咪話趁後生去做啲唔係自己做開嘅嘢，我咪畀幾年時間自己去衝囉！同埋依家又冇拖拍，寄情工作。」
幫朋友做媒人
原來Nicole於參選期間正值與拍拖6年的男友冷戰期，再加上其泳裝造型示人後更是雪上加霜：「佢覺得會畀人睇蝕，都嗌咗好多次交，最後都係要分手。到落選之後，我有一段時間低潮期，放棄自己暴飲暴食，又飲酒食甜嘢，一下子就肥咗22磅，真係慘不忍睹！」
幸而該段黑暗日子，隨住朋友告知「前度」結婚而結束，她說：「聽完真係叮咗一聲，因為之前都諗過想復合，但知道唔Work，所以就重新振作減肥。（依家有冇人追？）都有，但我男仔頭，約會完之後反而介紹畀朋友識，成功撮合幾對情侶，做咗媒人婆。」