牛雜妹專攻BB衫 雙喜臨門？

Monnie於2017年與糖水舖太子爺Jill拍拖，兩年以來感情穩定，隨住Monnie早前與經理人公司約滿變回自由身，據知，她無論事業及感情生活也希望更上一層樓，有意與男友結婚的她，疑似雙喜臨門！

日前Monnie現身港島區某商場，穿上白色鬆身連身裙，腰部明顯變粗，看似肚凸凸，惟步履輕盈，一馬當先去睇BB衫，還不時摸上手研究布料。及後她轉睇BB用品，包括餐椅、BB車及玩具等，不時用電話拍照向男友匯報，似乎已經為生B做好準備。經過一輪考察後，她經過壽司店想買壽司充飢，見她拿起壽司時卻嘴扁扁，未幾再放低，看似要戒生冷食物。

想搞生意先取經

昨日向Monnie求證，問到是否有喜，她笑說：「唔係，係我朋友有BB，我係揀禮物畀佢，睇吓有咩啱佢用。」又指其實有意搞嬰兒服裝生意，順道取經：「睇吓市場賣緊乜，其實我哋已經做晒市場調查，之前去過入貨，所以特登了解吓。」問到何時與男友拉埋天窗，她表示希望經濟穩定才組織家庭：「起碼唔會呢兩年，如果感情穩定，唔一定要拎多張證書，結婚對我嚟講係為咗生BB，我想有經濟基礎之後先組織家庭。」